Annonsørinnhold

20 bestselgere som garanterer nytelse

Dei syng om naturen, om æra og plikta
og kjærleiken gong etter gong.
Men aldri så har vel eit menneske dikta
om gangdøra heime ein song.
Men det veit eg visst at om ho kunne tale,
så kom det for dagen båd’ rettvist og gale.
Trala la la la la la la la.

Eg veit nok at ho kunne hendingar finne
frå mang ei forunderleg natt.
Om han som gjekk heimatt i rasande sinne
og ikkje kom oftare att.
Om han som du bad måtte aldri gå frå deg,
og han som du sprang frå og ikkje let nå deg.
Trala la la la la la la la.

Det kunne vel hende at døra laut flire,
men aldri i klinka det knatt.
Om klokka vart to eller tre eller fire
før de sa kvarandre god natt.
Nei, aldri du høyrde eit vondord ho seie,
ho tagde som berre ei gangdør kan teie.
Trala la la la la la la la.

Ho såg når det blenkte ei ørlita tåre,
når smila i andleta taut.
Ho høyrde vel ord som var beiske og såre,
og kanskje ein lovnad de braut.
Eg tenkjer ho såg når de stod der på troppa
og klemde kvarandre så hjarto dei hoppa.
Trala la la la la la la la.

Ja, gangdøra veit om ein gut kjem der ofte,
og om han er sein eller snar.
Ho veit om kva tid han får fylgje på loftet,
og ser kva slags sokkar han har.
Men når han fer utatt med skorne i neven,
då gjer ho ein knirk for å skræme den reven.
Trala la la la la la la la.

Ja, gangdøra heime ho er som eg seier,
den same mot helt eller skarv.
Og bra er det sanneleg og at ho teier
og ikkje fer kringom med slarv.
Men kanskje vi slutta å døme vår neste
om gangdøra sa det ho veit om dei fleste.
Trala la la la la la la la.

Tekst: Marie Lovise Widnes
Melodi: Elis Olsson

#marielovisewidnes #gangdøra